انزل ياواد من على كتاف القاهرة

مليون شهيد

وتاريخ مجيد

من الكفاح المشترك

وخوض غمار المعترك

و ف آخر الشوط أخسرك

مين علمك تقتل أخوك
وأمك وأبوك

واحنا اللى قدمنا الدماء

قبل العرق

خلاص وصلنا لمفترق

وثورتك .. حريتك

دول كان مخاضهم أرضنا

وف حضننا

تيجى انت تهتك عرضنا

تحرق علمنا
اللى كان شاهد على قبر الشهيد

وترهب الطفل الوليد

تنسى تاريخك يابليد

بقى هو دا الجيل الجديد

ده نسل بن بيلا وبومدين والرجال

اللى اما ضاق الكون عليهم

شدوا لبلادنا الرحال

رفعوا علمهم فوق صدورنا
قبل مايغوص فى الرمال

غمض عيونك جوا قبرك ياجمال

ما تشفش أحفاد النضال

واقفل ودانك

أصل البيان الجاى من صوت العرب

بيقول على المصرى انضرب

بيقول تاريخك كله كان وهم وخطب

نام يابطل

لاعليك ملامه أوعتب

وانزل ياواد من فوق كتاف القاهره

انت فقدت الذاكره

لاتصلى فى الأزهر

ولاتمشى ف حوارى السيده

ولاتسمع الكوكب وهى منشده

ولاتقرا محفوظ النجيب

ولاحتى تسمع عندليب

خليك كده

تحرم عليك

كل العيون والأفئده

تحرم عليك كل الدماء والأورده

وبريئه منك ألف مدنه

وكل جبهه ساجده

وأنا حفضل المصرى
كريم العنصرين

اللى متربى وساكن فى الحسين

اللى علمتك تقول الضاد
وتنطق كلمتين
يابو اللسان الأعجمى

انزل ياواد من فوق كتاف القاهره

من امتى بتشيل العيال
دى مصر ولادة رجال
سادات ... مبارك
ومعاهم الناصر جمال
واقفين على شط القنال
رافعين علمها
اللى بايديك اتحرق
رجاله من عزه وشهامه مش ورق
ياحارق الطوق والشراع
مين راح ينجيك من الغرق

» ازاى انزل صورة من النت على جهازى؟
» خطاب الرئيس الامريكي باراك اوباما للعالم الاسلامي من جامعة القاهرة _فيديو لايف