اتيكيت تناول الطعام والشراب ف العزومات

إتيكيت تناول الطعام والمشروبات في العزومات!!


السلام عليكم


ازيكم ؟


ايه اخباركم ؟


ان شاء الله بخير


يلا نعرف مع بعض إزاي ناكل



الشوربة





الشوربة لها طريقتين للتقديم إما أنها تتقدم من خلال فنجان صغير مخصص للشوربة، وفي الحالة دي مش هتلاقي مشكلة نهائي لأنك هتشربيها على طول من الفنجان مباشرة...
أو أنها تتقدم في أطباق الشوربة، وبكده هتستخدمي المعلقة، بس عايزاكي تاخدي بالك إنك ما تعمليش صوت وإنت بتشربي بالمعلقة، كمان ما تحاوليش تخلي المعلقة تحتك مباشرة بالطبق وتعمل صوت نتيجة الاحتكاك ده.
ومن الإتيكيت إنك تسيبي شوية شوربة صغيرين في نهاية الطبق.


السلطات





لو قدمت لك وهي مقطعة قطعاً صغيرة يبقى ما فيش مشكلة إنك تاكليها بالشوكة أو بالمعلقة لكن لو قدمت على شكل قطع كبيرة زي الأوراق الكبيرة للخس يبقى في الوقت ده هتستدمي الشوكة والسكينة علشان تقطعيها إلى قطع صغيرة مناسبة ليكِ.


الملاحة



بالنسبة لملاحة الطعام اللي من غير غطاء "المفتوحة" فدي ممكن إنك تاخدي الملح منها باستخدام طرف سكينة نظيفة وترشيه على الأكل... لكن لو كنتِ هتغمسي الطعام في الملح زي ما بيحصل في اللحوم هيكون كل اللي عليكِ هو وضع القليل من الملح على جانب الطبق الخاص بيكِ، وبالمناسبة دي أحب أقول لك إنك يا ريت ما تحطيش ملح على الطعام إلا بعد ما تدوقيه الأول وتشوفيه إذا كان محتاج ملح ولا لأ.
وخدي بالك إن الملاحة لو كانت بعيدة إنك ما تمديش إيدكِ فوق الطعام علشان تاخديها، وكل اللي تعمليه إنك تطلبي من الشخص اللي بجواره الملاحة إنه يقربها منك شوية.


العيش أو الفينو





العيش سواء كان بلدي أو الفينو عادة لما بيتقدم في العزومات بيكون متقطع لكن لو كان مش متقطع يبقى قطعيه أنت بإيدكِ قطعاً صغيرة على قد ما إنتِ محتاجة، واوعي تقطعي العيش بالسكينة.


البيتزا





في طريقتين ممكن إنك تاكلي بيهم البيتزا..
الطريقة الأولى: هي إنك تاخدي شريحة البيتزا في الطبق الخاص بيكي وبالشوكة والسكين تبدئي في تقطيعها زي ما إنتِ عايزة.
الطريقة التانية: وهي إنك تمسكي كل شريحة وتاكليها بإيدك بدون الشوكة والسكينة، ويا ريت ما تعمليش الطريقة دي إلا إذا كنت معزومة على الفطار وسط مجموعة من أصدقائك.


المكرونة الإسباجتي





أنا عارفة إن المكرونة الإسباجتي دي بالذات حكايتها حكاية، وممكن إنك لما تلاقيها على السفرة تتكسفي وما تاكليش، بس ولا يهمك، أنا هاقول لك على كذا طريقة سهلة خالص ممكن إنك تجربيها -وإن شاء الله- مش هتلاقي مشكلة في أكلها.
الطريقة الأول: وهي إنك تحطي الشوكة في المكرونة وبعد كده تحاولي إنك تلفي المكرونة حول الشوكة بس خدي بالك إنك ما تكتريش في الكمية اللي على الشوكة.
الطريقة الثانية: هي إنك تستخدمي الشوكة والسكينة في تقطيع شرائط المكرونة إلي أجزاء صغيرة تقدري إنك تاكليها.
وبالنسبة لـ"صلصة" المكرونة فممكن إنك تستخدمي معلقة المائدة الصغيرة في وضع الصلصة على المكرونة.


اللحوم والأسماك





أفضل طريقة تاكلي بيها اللحوم والأسماك هو إنك تاخدي قطعة اللحوم والأسماك الخاصة بيكِ وتضعيها في طبقك الخاص وبعد كده تقطعيها بالشوكة والسكينة، وخدي بالك إنه مش من الإتيكيت إنك تقطعي اللحوم مسبقاً، وبعد كده تاكلي، ولكن من الأحسن إنك تقطعيها قبل ما تاكليها مباشرة.


البطاطس بكافة أنواعها





لو كانت البطاطس محمرة وقدمت لكِ في طبق منفصل يبقى أنسب حاجة تعمليها إنك تاخذي الكمية المناسبة ليكِ بواسطة الشوكة على طبقك الخاص ثم تقطعيها إلي أجزاء صغيرة بالسكينة وتاكليها باستخدام الشوكة..
أما لو كانت بطاطس "بوريه" يبقى خدي الكمية اللي إنتِ عايزاها بواسطة معلقة المائدة الصغيرة وحطيها في الطبق المخصص ليكِ.


الحلويات





دي هتاكليها إما باستخدام المعلقة أو بالشوكة، بس خدي بالك إن المعلقة هي أحسن طريقة تاكلي بيها "الآيس كريم" في العزومات.


الفاكهة





ودي بتنقسم إلى الفاكهة اللي بتحتوي على عصير زي "الخوخ"، ودي أنسب طريقة لأكلها إنك تقشريها وبعد كده تقطعيها بالسكينة وبعد كده تاكليها بالشوكة.
ولكن الفاكهة اللي ما فيش فيها عصائر زي "التفاح" فدي تقطع بالسكينة وبعد كده ما فيش مشكلة إنك تاكليها بإيديكِ، ونفس الحكاية مع البرتقال.
بالنسبة للفاكهة اللي فيها نواة زي البلح أكيد طبعا هتحتاري إنك تحطي النواة فين ،بس ولا يهمك ممكن إنك بعد ما تاكليها بهدوء شديد تحطي النواة في طبق الفاكهة الخاص بيكِ.
وكمان خدي بالك علشان ما تقعيش في الأخطاء دي:
1. إنك تعملي شاطرة وما فيش زيك وتضغطي بإيدك على الفاكهة علشان تتأكدي من إنها طازجة ولا لأ؟
2. بلاش تاكلي الفاكهة بشراهة شديدة كأنك أول مرة تشوفي فاكهة، يعني كفاية قطعة أو قطعتين من الفاكهة.
المشروبات

بالنسبة للمشروبات الساخنة زي الشاي لو وضع في "مج" هتقابلك مشكلة وهي فين هتحطي باكت الشاي؟!
وهيكون حلها إنك بعد الضغط عليه بواسطة المعلقة على أحد جوانب الكوباية تحطي باكيت الشاي في الصينية المقدم عليها الأكواب.
لكن لو قدم الشاي في فنجان يبقى حطي باكت الشاي الورقي على طبق الفنجان، ولو حصل ووقع بعض من الشاي على طبق الفنجان هيكون من الأفضل إنك تطلبي طبق تاني أو إنك تجففي الطبق وأسفل الفنجان بالمنديل الورق.
وخدي بالك إنك ما تحاوليش تعملي صوت أثناء الشرب حتى لو كانت المشروبات شديدة السخونة، وسيبيها لغاية ما تبرد وبعد كده اشربيها.
أما بالنسبة للمشروبات الباردة زي المياه الغازية والعصائر فدي ما فيش مشكلة في شربها من الكوب الزجاجي اللي وضعت فيه.



وبكده يكون خلص كلامنا النهارده
عن إتيكيت تناول الطعام والمشروبات في العزومات